Pokeguide再回應—
個狀況係：Pokeguide指自己有營運資料提供過俾MTR，
而MTR亦可能有以此為基礎，再花資金去重新做過份官方資料。
Pokeguide要求/希望MTR同Pokeguide或其他startup合作開發，
省錢益同業，而唔係直接飛起一班傾過、拎過資料既公司，自己再放一筆錢去搞，變相將呢個成本加左落市民既車費度。
(呢個理解應該冇錯？)
(唔知個波會唔會繼續傳呢？)
“POKEGUIDE正式回應 - 地鐵App推出嘅兩個新功能” 2
大家好。因為創辦人啱啱飛咗去美國三藩市做地鐵research，所以今日一直未能夠有時間逐一回覆，而以下係我地對MTR客戶體驗拓展總經理Annie嘅回應：
關於「站內搜尋」，唔知MTR客戶體驗拓展總經理Annie除咗睇哂自己個post嘅留言，有冇睇埋我地個post嘅留言呢？我地嚮留言post咗會議內曾經提出過嘅三張slide，主要係有兩個idea：
(1) 地鐵站內加beacon可以引導人入站出站
(2) 地鐵幕門加beacon除咗幫助傷健人仕，仲可以偵測有幾多人出入車廂，從而建議大家可以走去比較空嘅車廂等車。
當幾位地鐵高層聽完 (2) idea，有具體地講解其實地鐵已經用緊另一種技術去偵測車廂人流狀況，咁固然冇問題。但當聽完 (1) idea，高層們嘅回答係：「個idea好好呀，我地會返去先同其他唔同部門同事研究吓」，如果地鐵一直係有著手研究，點解唔喺會內好似講解 (2) idea一樣咁提出，同埋點解之後冇再follow up？
至於「快捷出站」，我地從來着眼點唔係控訴港鐵app抄咗我地Pokeguide嘅功能，而係點解有咁多startup已經做咗呢個功能，唔係傾吓大家點樣合作，而係出面再花一筆錢請人再做過資料搜集？點解要用大家每年加多咗嘅票價換取呢千萬無必要嘅洗費？？
另外有一點想同大家討論吓，有人話我地係自己蠢，自己送上門講哂idea，俾人抄係自作自受。我想講，作為startup一間細公司，唔係應該要盡量爭取同大公司合作嘅機會咩？身為細公司唔提供有價值嘅建議，咁仲點會有大公司願意同你合作？我地做startup永遠只可以處於最被動嘅角色，講咗idea最後大公司唔做，唯有下次再接再厲，但係如果講咗idea，最後大公司自己搵人再做番相同嘅idea，係咪間startup抵死？我諗呢個問題好值得大家思考。
Pokeguide本來係一份大學嘅FYP，由2013年初開始構思以至實行走遍全港所有地鐵站 (大學教授可以証明時間)，親自逐一紀錄每個站嘅車卡車門資料，當時香港做過資料搜集，ios/android app store上係冇一隻app做呢個題材。喺我地app 2015年正式出現於市場前，確實亦有一D差唔多功能嘅app開始出現咗，而我地有志於做全球嘅地下鐵攻略，所以亦都有嘗試聯絡其他呢類app嘅開發者，希望可以共同合作做一個更厲害嘅產品，俾全球嘅地鐵乘客使用。所以喺我地心目中呢類idea根本好多人都有諗過，只係實踐嘅人少，願意花心思去哂每一個站嘅人少。。除咗我地之外大家亦可以嘗試下載 「速逃」、「MTRush」、「Citymapper」呢類都擁有類似我地功能嘅app，其實大家都係為建造香港智慧城市而出一分力，就算將來有更多app/大公司要加入戰團，我地都樂於接受挑戰，香港人生於這個地方，就係有競爭先會有進步。
最後希望 MTR 可以正面回答問題，俾大家一個好好嘅交代。
Search